SEIC Haree Ekipamentu Ne’ebé Abandona Iha Letefoho

Sekretáriu Estadu Industria no Kooperativa Nino Pereira iha loron 05 Jullu 2013, vizita ba Letefoho – Ermera, hodi haree direita kondisaun Grupu Agrikola Hatlaugeo ne’ebé hetan ona apoiu husi Governu iha tinan 2012, liuhosi Ministériu Dezenvolvimentu Ekonomia iha IV Governu Konstitusionál. 

Grupu Agrikola hetan ona apoiu makina pakote ida ne’ebé inklui makina harahun, dulas, hamutin, hamanas no halo pakote. Maibé sira-nia aktividade durante simu tiha ekipamentu lala’o, tanba iha fallansu ba utilizasaun makina (operasaun makina) ne’ebé la iha téknika sira ne’ebé bele ajuda iha operasaun ne’e. Tanba ne’e, grupu ne’e husu atu suporta asisténsia teknika atu ajuda aktiva hikas sira-nia aktividade. Grupu Agrikola Hatlaugeo iha nia membru hamutuk nain-120 konsiste husi feto nain-40 no mane nain-80. Sira hetan apoiu makina sira ne’e ho orsamentu totál kuaze 34 mlliaun Dollar Amerikanu. 

Iha vizita ne’e, SEIC Nino hateten katak, MCIA liuhosi SEIC sei buka solusaun oinsá bele ajuda ka suporta asisténsia téknika hodi hala’o hikas aktividade refere. Tanba Governu ajuda tiha ona ekipamentu pakote ida maibé tanba la iha asisténsia téknika rezulta ekipamentu sira abandona.

Iha momentu ne’e, SEIC Nino akompaña husi Asesór TéknikaAugusto Junior Trindade, no Xefe Departamentu Dezenvolvimentu Industriál Claudio da Conçeicão Pereira ne’ebé haree direita makina sira ne’e. Tanba ne’e, SEIC Nino afirma katak Governu hakarak atu akompaña nafatin aktividade industriál sira ne’ebé maka hetan ona apoiu.

Rui Alberto Koordenadór Grupu Agrikola Hatlaugeo hateten katak problema ne’ebé durante ne’e sira hasoru maka la iha asisténsia téknika husi Ministériu refere, bainhira ekipamentu sira to’o ona iha Grupu Hatlaugeo ne’e. Tanba ne’e maka to’o ohin loron aktividade lala’o.  Ekipamentu sira agora tau de’it iha sentru kooperativa/KUD nian fatin. 

Hafoin remata vizita fatin ekipamentu sire-ne’e, Administradór Sub-distritu Letefoho hateten katak grupu agrikola hatlageo bele uza provizóriu fatin ne’ebé iha hodi hala’o aktividade liu-liu treinamentu ruma ne’ebé presiza hodi suporta industria ida ne’e. 

Objetivu

Objetivu vizita ne’e nuudar fiskalizasaun no mós monitorizasaun ba apoiu sira ne’ebé Governu halo ona, atu nune’e Governu bele haree besik liu problema ne’ebé durante ne’e komunidade sira hasoru.  

Makina ne’ebé Grupu Agrikola Hatlaugeo hetan.

SEIK Vizita Industria Kafé Familia

Sekretáriu Estadu Industria no Kooperativa vizita mós Kafé Familia ne’ebé eziste iha Aldeia Ladiki, Suku Letefoho, Subdistritu Same-Vila. Grupu Familia ne’e lidera husi Sr. Natalia da Costa Noronha. Sira-nia produsaun sei uza ekipamentu tradisionál maske sira hetan ona makina packing husi ARDP III – Uniaun Europeia hodi fasilita ba partisipa eventu Don Boaventura nian. Sira-nia ekipamentu packing ne’e a’at tiha ona, tanba ne’e sira la bele halo-tan pakote ba sira-nia produtu. Sira la iha makina dulas kafé maibé uza de’it manuál.

Objetivu  Vizita

Vizita Sekretariu Estadu no Industria ne’e atu haree besik liu problema ne’ebé industria kiik sira enfrenta iha baze, hodi nune’e Governu liuhosi SEIC-MCIA bele buka solusaun ba problema ne’ebé empede aktividade industriál sira iha nasaun ne’e.   

        

Rezultadu

SEIK ho nia komitiva konsege hasoru malu ho Grupu Industria rua(Industria Kafé no Kafé Familia) no Artezenatu ida (Lafaek Arte) ne’ebé eziste iha Same-Vila, Maun-fahe. Sira-nia produtu iha kualidade di’ak no bele atrai konsumidór sira ne’ebé hakarak atu sosa. Maibé Industria Kafé nia aktividade maka seida’uk la’o tanba kondisaun atu harii uma la favorese, maibé promete katak sei bele hala’o aktividade refere kuandu kondisaun permite ona.