SEIC Asina Kontratu Ho Grupu Benefisiáriu Distritu 13

Ministériu Komersiu Industria no Ambiente liuhosi Sekretáriu Estadu Industria no Kooperativa asina ona kontratu ho grupu benefisiáriu nain-230 mai husi Distritu 13 kona-ba transferénsia orsamentu subvensaun públika iha Centro Convenção de Dili (CCD) loron 03/08. Orsamentu subvensaun públika ba tinan 2013 nafatin hanesan ho 2012 ne’ebé hamutuk US$ 400,000.

“Se ita kompara ho tinan 2012, benefisiariu ne’ebé mak hetan 149 grupos husi US$ 400,000.Iha tinan 2013, orsamentu ba subvensões públicas la aumenta, nafatin ho US$ 400,000, maibé númeru benefisiarius sae ba 230 grupos, signifika aumenta 81 grupos (64%).” SEIK hateten.

Sekretáriu Estadu Indústria no Kooperativa Nino Pereira iha nia dizkursu afirma, fundusubvensaun públika MCIA ho naran HAKAT (HAkbi’it produKtividade ekonomiA komuTaria) sei dada partisipasaun direita grupu empreza industria, kooperativa no empreza ki’ik sira liu-liu hodi hakbi’it no fortifika produktividade sira nian iha vida emprezariál.

            SEIK Nino Espera, iha tempu ikus mai bele prodúz emprendidór ne’ebé kualifikadu no bele fornese serbisu ba ema seluk mós. Fundu ne’e sei la’o ho karakter efikas no efisiensia atu hametin organizasaun sira ne’e hodi bele alkansa objetivu ba moris diak no redusaun kiak iha ita nia rain.

“Sorumutu ida ne’e importante tebes hodi fórtifika komitmentu V Governu Konstitusionál ba dezemvolvimentu ekonomiku no kriasaun empregu, liuhusi apoia ba inisiativa produtivu komunidade nian ho programa subvensões públicas. Programa ida ne’e ninia objetivu spesífiku maka fasilita hodi fó tulun ba aktividades pekenas indústria, kooperativas no mikro emprezas atraves husi alokasaun orsamentu.” Hateten tan.

SEIK mós husu benefisiáriu sira, atu ida-idak, iha grupu nia laran kuda espíritu fiar malu, transparánsia, nakloke ba malu, onestu, no respeita malu. Tanba osan bele halo ema hamutuk, osan mós bele halo ema fahe malu.  tanba ne’e grupu hothotu tenke kuidadu iha utilizasaun osan ne’e.

“Jere ho didi’ak no responsabilidade. Lalika haree ba kuantidade osan ne’e, maibe importante liu mak ita nia komitmentu, seriedade (keseriusan), ita tenke fókus, pasiensia, no iha korajen atu halo inovasaun. Keta haluha mós atu hatama relatoriu orsamentu no atividades, ida ne’e sai nudar sasukat husi kapasidade grupos nian iha ezekusaun orsamentu.”  Afirma tan.