SEIK, Governu Apoia Inisiatva Ne’ebé Kontribui ba Dezenvolvimentu

Tasitolu – SEIK NINO PEREIRA haree produtu vazu no meja ne’ebé Grupu Indústria Lifau Beach produz.

Sekretáriu Estadu Indústria no Kooperativa Nino Pereira iha Seguunda (09/06)halo vizita ba Grupu Indústria Lifau Beach iha Masin Lidun, Tasitolu, Dili, hodi haree aktividade grupu ne’e nian. Iha vizita ne’e, Sekretáriu Estadu hatete, Governu sei kontinua fó apoiu ba inisiativa ne’ebé kontribui ba dezenvolvimentu nasionál.

          “sira-nia aktividade ne’e di’ak, bele kontribui ona ba dezenvolvimentu nasaun ida ne’e. Maske sira enfrenta difikuldade hanesan la iha asesu di’ak ba merkadu. Maibé hanoin katak Governu bele promove produtu ida ne’e, atu sira kontinua hamoris kriatividade ne’e.”  SEIK NINO hateten.

José da Costa, koordenadór ba grupu indústria kiik ne’e hatete, sira-nia grupu eziste ona iha tinan kotuk maibé sei enfrenta difikuldade barak. Tanba la iha asesu di’ak ba merkadu. Maibé sira iha planu atu haboot sira-nia aktividade ho kbiit ne’ebé sira iha no hein katak Governu bele apoia atu sira bele kontinua la’o ba oin.

          “Timoroan bele iha mehi ida realidade katak ita partisipa iha dezenvolvimentu. Ita hakarak uza potensialidade ne’ebé iha hodi fó empregu mós ba komunidade sira ne’ebé hakarak partisipa iha prosesu dezenvolvimentu.” Jose hateten.

José mós informa, vaju no meja ne’ebé sira enfeita ho fatuk kiik sira iha tasi ne’ebé halibur husi komunidade sira iha Baukau, Dili no Oekusi. Sira sosa husi komunidade ho folin kada saka dolar tolu sentavu lima nulu (3,50 USD). Ho asaun ne’e bele emprega ona komunidade sira no sira bele hetan osan atu sustenta sira-nia moris loro-loron nian.

          “Loos katak serbisu ida ne’e presiza iha pasiénsia. Maske ami seida’uk iha fatin para hala’o ami-nia aktividade. Ami husu aluga uma maibé kustu boot liu, fulan ida 350 USD, liu tiha ami-nia rendimentu. Tanba ne’e, ami sei la’o hanesan hela, hodi dezenvolve daudauk ami-nia aktividade ne’e.” José esplika tan.

 Maske enfrenta difikuldade oioin, Grupu Lifau Beach iha ona mehi atu hamosu empregu ba ema nain-600. Sira mós iha planu atu diversifika motiva (motif)  produtu ida ne’e atu  atrai konsumidór sira-nia hakarak.

José mós rekomenda, produtu ida bele uza iha jardin sira hanesan Kolmera, Lesidere no fatin públiku seluk ne’ebé hakarak dada turista sira. Tanba vaju no meja ne’ebé sira halo uza fatuk ne’ebé hili no halibur iha tasi. (RZ)