MKIA SEI REALIZA FEIRA IHA SALELE

 

Add captionObserva fatin feira iha Salele, foto Roger

Sekretáriu Estadu  ba Indústria no Kooperativas Filipus Nino Pereira hamutuk ho ekipa komisaun organizadora Feira 30 Augustu 2014, ne’ebé kompostu husi Diretór Jerál Indústria no Kooperativa Leovigildo dos Santos, no Diretór Jerál Komérsiu Cosme Fatima Batista da Silva, halo ona observasaun ba fatin feira no koordena ona ho autoridade lokál sira iha Distritu Kovalima hodi prepara ba aktividade sira iha eventu ne’e.

“Enkontru badak  ne’e atu halo koordenasaun aktividade feira iha Salele no observa situasaun iha terenu para haree apoiu ne’ebé nesesáriu ba realizasaun feira ida ne’e.” Nino hatete banhira enkontru ho administradór Distritu Kovalima iha edifisiu administrasaun distritál Suai (09/08).

Administradór Distritu Kovalima Augustinho Mendonça esklarese, autoridade sira iha Distritu ne’e, liu-liu parte estatál nian, sei kria komisaun apoiu ba aktividade hodi nune’e bele hala’o dauda’uk preparasaun ba eventu ida ne’e.

“Ami sei organiza malu para kria ona komisaun ba apoiu eventu feira ida ne’e, no para envolve komunidade atu sira bele partisipa iha eventu ida ne’e.” Agustinho hateten.

Ministériu Komérsiu Indústria  no Ambiente planeia ona atu realiza eventu feira 30 Augustu tinan ne’e iha Salele, Tilomar, Kovalima. Eventu ida ne’e halo ho objetivu atu introdus produtu industriál no promove aktividade komersiál no mós kria amizade entre komunidade fronteira iha Distritu Kovalima.

Alen halo enkontru ho administradór, ekipa preparativa feira mós halo enkontru ho komandante UPF iha fronteira Salele, hodi hatene situasaun no observa kondisaun iha fronteira relasiona ho situasaun seguransa iha fronteira Salele.

“Ami sei manda karta ba komandu jerál para haree eventu ne’e hodi apoiu tan pessoál balun para reforse seguransa durante eventu ne’e realiza.”Komandante Mateus Nahak informa.

Sekretáriu Estadu mós halo observasaun direita ba merkadu Salele ne’ebé estabelesidu husi Ministériu Turizmu, Komérsiu no Indústria, iha periudu governasaun Aliansa Maioria Parlamentár. Tuir observasaun, merkadu fronteira ne’e la utiliza ba aktividade komersiál maibé sai fali fatin mahon ba familia.

Tanba Ministériu Komérsiu Indústria no Ambiente iha fulan ne’e realiza aktividade feira ho objetivu atu hamoris hikas aktividade komersiál no amizade entre komunidade Timor-Leste no Indonézia iha fronteira Salele.

 Tuir planu, eventu ne’e sei inklui mós aktividade dezportu sira, ne’ebé sei partisipa mós komunidade sira husi Malaka, Atambua, maibé sei koordena ho embaxada Indonézia iha Timor-Leste, atu bele programa sira ne’e hetan partisipasaun di’ak husi sidadaun rai rua ne’e. ___