SEIK; INDÚSTRIA MASIN BENEFISIA POVU TIMOR-LESTE

 

Monitorizasaun- SEIK Nino Pereira rona hela esplikasaun husi tékniku Pt. Garam Eko Salaudin iha fatin masin fatin, Ulmera/foto Roger

Dezde simu knaar nu’udar membru Governu, Sekretáriu Estadu Indústria no Kooperativa Filipus Nino Pereira hahú ho prioritiza dezenvolvimentu seitór indústria komesa husi aktividade indústria kiik sira ne’ebé eziste ona, no kontinua motiva timoroan sira atu halo aktividade indústria nian. 

Programa prioritáriu husi Sekretaria Estadu ida-ne’e balun hatudu ona progresu pozetivu ne’ebé komesa muda situasaun ekonomia familia nian iha Timor-Leste.  Aktividade indústria kiik sira liuhosi orsamentu subvensaun públika hetan ona kbiit atu buras no kontribui ba dezenvolvimentu ekonomia nasaun nian.

Alein produtu bee-minerál no kafé, masin mós sai prioridade númeru dahuluk programa Sekretaria Estadu Indústria no Kooperativa nian, durante periodu Governasaun ida-ne’e. Tanba masin importante no bele benefisia povu Timor-Leste.

            “Halo mudansa téknolojia para hasa’e kualidade no kuantidade produsaun, Governu introduz utilizasaun téknolojia ne’ebé propriu ba fabrika masin ne’e,”. SEIK Nino hatete.

Sekretáriu Estadu hato’o liafuan ne’e banhira halo abertura aktividade treinamentu loron rua kona-ba téknika produsaun masin (13 Augustu 2014), ne’ebé partisipa husi agrikultór masin sira iha Ulmera, Likisa. Treinadór ba treinamentu ne’e mak téniku Pt. Garam Eko Salaudin.

“Ita prontu atu transfere matenek no esperiénsia ba agrikultór masin iha Timor-Leste. Nune’e fabrika masin ida-ne’e bele benefisia povu Timor-Leste,”  Eko hateten.

Indústria masin ne’ebé jere husi Federasaun Kooperativa Sentrál Tokodede ne’e, hetan ona apoiu husi Sekretaria Estadu Indústria no Kooperativa – Ministériu Komérsiu Indústria no Ambiente ho montante dolar rihun 154, no apoiu tékniku husi UNDP liuhosi programa Social Business. Alein ne’e Governu mós halo ona kontratu ho Pt. Garam hodi halo akompañamentu ba konstruksaun fatin masin iha Ulmera.  

“Federasaun sei jere osan ne’e didi’ak para halo fabrika masin ne’e la’o di’ak no bele benefisia povu Timor-Leste, no atu osan estadu nian bele utiliza ho di’ak no bele dignifika Governu ka Estadu Timor-Leste,” Prezeidente FCCT João Alegria hateten iha abertura treinamentu ne’e.

UNDP resident respresentative Knut Otsby mós hatete, UNDP apoia fabrika masin liuhosi programa social business no serbisu hamutuk ho MCIA liu-liu Sekretariu Estadu Indústria no Kooperativa. Programa social business ida ne’e atu aselera realizasaun Objetivu Dezenvolvimentu Miléniu (Millenium Development Goal).

“Ami haree iha Ulmera agrikultór masin eziste kleur ona,uza metodu produsaun tradisionál, kapasidade produsaun kiik, risku boot ba ambiente no gasta enérjia barak,” Knut hateten.

Hafoin abertura treinamentu Sekretáriu Estadu hamutuk ho ekipa husi UNDP no ROK halo monitorizasaun ba aktividade konstruksaun indústria masin.  Iha terenu hatudu konstruksaun iha progresu, maibé presiza atu halo barajen ba kanalizasaun bee-tasi liu-liu kabubu ne’ebé satan be’e tasi wainhira laloran boot, no produsaun masin iha tarjeitu sei halo kolleta masin iha fulan setembru 2014 ho rezultadu 40 toneladas. _@