Monitoriza Progresu Indústria Mármore no Masin

SEIK, TENKE APROVEITA ONA POTENSIALIDADE HO AKTIVIDADE INDÚSTRIA

Monitorizasaun-SEIC NINO PEREIRA (klaran)haree hela makina produz bloku mármore no rona informasaun husi prezidente FJA Jacinto Alves (kaer hela makina)/foto, Roger.

Sekretáriu Estadu Indústria no Kooperativa Filipus Nino Pereira akompaña husi Diretór Indústria Bens no Konsumu Fernando Lobato no Xefe Gabinete Apolo J. França da Silva halo vizita motorizasaun ba fatin indústria artezenatu mármore no indústria masin iha Manatutu, Segunda (19/08) foin lalais, hodi haree progresu preparativu produsaun produtu rua refere.

            “Atu haree de’it oinsá preparasaun empreza sira-ne’e ba indústria artezenatu mármore no indústria masin, para ita tenke bele aproveita ona potensialidade ne’ebé ita-nia rain fornese,” SEIK Nino hateten bainhira vizita Fundação Jandira Alves (FJA) iha Beehau Segunda foin lalais. “Mós atu haree katak empreza sira ezekuta orsamentu estadu ne’ebé aloka tiha ona ne’e, iha rezultadu di’ak ka la’e.”

Ba Indústria artezenatu mármore hetan apoiu husi Sekretaria Estadu Indústria no Kooperativa - Ministériu Komérsiu Indústria no Ambiente humutuk 60 mil Dolar Amerikanu no indústria masin ne’ebé empreza balak salt jere hetan apoiu ho montante 106 mil USD.

Tuir observasaun, FJA prepara ona makina produsaun bloku no plaka mármore, dada be’e husi foho no monta trafu 20 KV para hein instalasaun eletrisidade hodi halo operasaun indústria artezenatu mármoru ne’e. FJA sei halo produsaun mármore iha fulan rua ikus tinan ne’e bainhira ekipamentu no tékniku sira halo ona instalasaun kompletu.

“Indústria ne’e atu transforma buat ne’ebé la iha valór sai iha valór. Ita-nia ambisaun ba produsaun ida ne’e para faan iha merkadu doméstiku no halo mós esportasaun. Ita mós iha planu atu transforma knu’a ne’e sai knu’a indústria kiik artezenatu mármore, nune’e bele lori impaktu ba sosio-ekonomia ba povu ida ne’e,” Prezidente FJA Jacinto Alves hateten.

Prezidente FJA planea atu indústria artezenatu mármore envolve ativamente komunidade sira no liu-liu utilizasaun produtu tesidu ba embalajen (Ind: kemasan) mármore. Jacinto esplika, presiza de’it atu Governu liuhosi prezensa unidade indústria nian iha knu’a ne’e atu jere, dezena no dezenvolve indústria mármore. Tanba indústria mármore sei lori impaktu ekonomiku ba nasaun ida-ne’e iha futuru.

Hafoin remata vizita fatin indústria artezenatu mármore, Nino Pereira hamutuk ho ekipa halo vizita monitorizasaun ba Balak Salt hodi haree mós progresu preparasaun ba produsaun masin, liu-liu progresu konstruksaun fízika ne’ebé importante ba produsaun masin refere.

Iha terenu hatudu, empreza balak Salt besik ona atu remata konstruksaun fízika sira hanesan konstroe kanalizasaun bee tasi, parsela ba kristalizasaun masin no kabubu hodi satan ameasa husi tasi. Jestór iha terenu Luis Alves de Rego afirma, konstruksaun fízika sira besik ona remata, produsaun masin sei hahú iha Setembru no sei halo kolleta iha fulan Novembru iha tinan ne’e.

“Ita sei halo panen perdana (kolleta primeira) iha fulan Novembru, ha’u garante katak ida ne’e bele akontese,” Luis hateten.___