SEIK Vizita Kooperativa Hali Buras


SEIK vizita KOHABU iha Aiasa, Bobonaro (01 Outobru 2014)

Sekretáriu Estadu Indústria no Kooperativa Nino Pereira halo vizita traballu ba Aiasa Subdistritu Bobonaro Distritu Bobonaro (01/10) hodi haree grupu indústria kiik no kooperativa sira ne’ebé eziste ona iha knu’a refere.

“Mai iha ne’e atu haree saida maka komunidade presiza apoiu husi Governu. Tanba Governu liuhosi Sekretaria Estadu Indústria no Kooperativa, Ministériu Komérsiu Indústria no Ambiente hakarak dezenvolve grupu indústria kiik no grupu kooperativa sira, nune’e, komunidade bele partisipa di’ak liu tan ba iha prosesu dezenvolvimentu nasionál,” SEIK Nino hateten iha vizita ne’e.

Iha vizita ne’e Sekretáriu Estadu vizita ba Kooperativa Hali Buras (KOHABU) hodi haree aktividade ne’ebé sira halo ona. Grupu nia aktividade sira maka hanesan karpintaria, hortikultura no haki’ak ikan. Maibé tuir observasaun hatudu katak kondisaun iha knu’a ne’e propriadu ba hakiak bibi no manu. Tanba fasil ba komunidade atu hetan aihaan ba animal ne’e.

“Kooperativa sai nu’udar meius ne’ebé di’ak liu atu envolve komunidade iha prosesu dezenvolvimentu ekonomiku liu-liu hadia ekonomia familia nian. Kooperativa mós hanorin komunidade fila-liman ho badinas no bele tulun kustu edukasaun nian ba labarik sira,” SEIK hateten tan.  

Prezidente KOHABU mós afirma, kooperativa ida-ne’e moris husi inisiativa komunidade sira iha Aiasa. Maibé kooperativa ida-ne’e presiza tebes apoiu husi Governu liu-liu kapasitasaun no apoiu finanseiru hodi haboot tan aktividade.

“Komunidade sira iha ne’e hothotu hakarak sai membru ba kooperativa. Iha tempu indonezia komunidade sira iha ne’e barak mak sai membru kooperativa. Tanba ne’e sira hatene duni katak kooperativa ne’e di’ak ba hadia kondisaun familia nian, maibé tenke iha tan treinamentu ka apoiu finanseiru ruma,” Prezidente KOHABU hateten.