SEIC VIZITA KOMUNIDADE PESKADÓRIA IHA BOGOR

Sekretáriu Estadu Industria no Kooperativa hamutuk ho ekipa estudu komparativu vizita mós komunidade peskadória Tunas Mina Terpadu (P2MKP) no Kooperativa Bening Food iha Bogor (24/07)ho objetivu hetan referénsia ba harii kooperativa sira iha Timor-Leste ne’ebé la’ós de’it foka ba kooperativa negósiu, industria ka kreditu maibé bele mós harii kooperativa peskadória,  kooperativa funsionária, ka seluk ne’ebé bele fó benefisiu ba komunidade hotu.

Iha vizita ba komunidade haki’ak ikan iha Aldeia Setu, Suku Pabuaran, Subdistritu Kemang, Distritu Bogor, Provinsia Java Oeste, Sekretáriu Estadu Nino Pereira hamutuk ho nia komitiva hasoru malu ho H. R. Suryadi, ne’ebé nuudar ema ne’ebé maka haki’ak barak liu ikan iha Aldeia Setu no sai mós ema ne’ebé kleur liu haki’akikan Gurame, Mas, Lele no Bawal.

Sekretáriu Estadu iha hasoru malu ne’e hateten katak Governu Timor-Leste sei buka atu hametin serbisu hamutuk ho Governu Indonezia iha setór Industria no Kooperativa hodi hare ba iha asisténsia teknika no mós hasa’e koñesimentu ba jestaun no mós oinsá bele hetan liña merkadu ne’ebé di’ak hodi bele distribui produtu sira tuir nesesidade merkadória nian. Sekretaáriu Estadu husu mós Suryadi atu sai hanesan treinadór ba haki’ak ikan iha Timor-Leste maibé liuhosi koordenasaun Sekretária Estadu Peskadória nian iha futuru. Tanba ne’e, iha planu, bainhira fila fali ba Timor-Leste Sekretáriu Estadu Industria no Kooperativa sei hasoru malu ho Sekretáriu Estadu Peskadória hodi diskute kona-ba oinsá bele kria kooperativa peskadória ba komunidade peskadória sira tantu peskadória tasi nian ka haki’ak iha be’e nian. 

Tuir Sekretáriu Estadu, estudu komparativu ida ne’e tenke bele hetan buat ruma ne’ebé merese sai nuudar banati no referénsia di’ak liu ba Timor-Leste nia vida ekonomia.

“Timor_leste iha poténsia atu haki’ak ikan tanba iha rai luan ne’ebé abandona, no ida ne’e sai nuudar ami-nia esperansa atu harii ona kooperativa ikan. Ne’eduni baihira ami fila husi indonesia, ami sei koordena ho Sekretariu Estadu Peskas atu delega ema mai apreen de iha ne’e (Bogor)”. SEIC Nino hateten. 

 

Fatin Hakiak Ikan

SEIC Nino husu H.R Suryadi atu bele fahe esperiénsia ba Timor-Leste bainhira timoroan sira mai halo estudu iha Bogor kona-ba haki’ak ikan. SEIC Nino, ho estudu komparativu ne’e, sei bele rezulta buat ruma di’ak ba Timor-Leste. Tanba ne’e husu atu ema hotu bele koopera hodi dezenvolve Timor-Leste iha setór hothotu. 

Hafoin remata vizita fatin haki’ak ikan, Sekretáriu Estadu mós ho nia ekipa estudu komparativu ne’e vizita ba Kooperativa Produsaun Bening Food iha Bogor. Kooperativa produsaun ne’e halo aihan sira husi ikan ne’ebé komunidade sira haki’ak. Ikan sira ne’ebé iha produz sai aihan oioin bele faan ba iha loja sira no mós restaurante sira ne’ebé. Iha vizita ba sentru kooperativa produsaun, SEIC Nino ho nia ekipa estudu komparativu hasoru malu ho diretór Purnani hodi haree besik liu prosesu produsaun no rezultadu produsaun ne’ebé kooperativa ne’e hala’o.

SEIC hamutuk ho diretora Bening Food

Sekretáriu Estadu husu diretór Bening Food Purnani sai nuudar treinadór ba maluk timoroan sira iha futuru. Nune’e, bele kapasita timoroan sira hodi hatene produz ikan sai hahan ne’ebé ho tipu oioin no folin ba ema hotu nia saude. Diretór Purnani iha nia intervensaun hatete, nia prontu atu sai nuudar treinadór iha Timor-Leste bainhira de’it. Maibé nia husu atu Governu Timor-Leste bele fasilita nia transporte no akomodasaun durante iha Timor-Leste. Tuir nia osan la sai problema, maibé nuudar ema, nia mós presiza han no presiza mós hodi responde nia nesesidade sira. 

Diretór Jerál Leovigildo do Santos iha nia komentáriu hateten katak, ba oin Timor-Leste sei lori diretór bening food ba Timor-Leste hodi hanorin maluk sira oinsá halo ikan sai hahan sira ne’ebé oioin.  Governu sei prepra no fasilita diretór Bening Food hodi fahe esperiénsia ba maluk sira iha Timor-Leste. Tanba Timor-Leste iha poténsia boot atu halo produsaun ikan, maibé la iha produsaun tanba la soi koñesimentu sira kona-ba produsaun refere.

Aktividade Industria Bening Food